هواي من المربين المقبلين على شراء طيور منتجة سواء طيور زينة أو #ببغاوات يفضل شراء الأمهات مع البيض بحكم تعظيم الفائدة وهنا هذا الموضوع بي مخاطر وبي فوائد, شنو هي:
المخاطر:
1. إذا كنت تريد تشتري من شخص متعرفه فهنا ممكن يكون البيض غير مخصب إذا كنت غير ملم بأمور الإنتاج أو ممكن البيض يكون لغير نوع من الطيور.
2. هجر الأمهات للبيض نتيجة لتغير المكان والبيئة المحيطية ككل وبالتالي البيض حيفسد وهذا الجانب ممكن ننطي نسبة 90%.
أما الإيجابيات:
1. تكون صفقة رابحة نوعا ما بحكم السعر ممكن يكون اقل لو البيض فقس وطلعن أفراخ مما لو اشتريت أمهات مع أفراحهم.
2. الأفراخ ممكن تربيهم كهاوي إلى مرحلة البلوغ وتزاوجهم وبالتالي تعرف اصل الدم مال الأفراخ بالجيل الثاني أو تبيعهم وتستفاد منهم.
نصيحة
حتى تبقى بالجانب الأمين #نصيحة لا تشتري أمهات عدهم بيض ولو تريد تاخذ وجان قرارك نهائي هنا لازم تفحص البيض يكون ظهرت بي الشرايين الدموية حتى تكون متأكد 100% من التخصيب ولازم عندك أزواح ثانية أيضا عدهم بيض ليش؟ حتى لو صار عندك هجر بيض نتيجة تغيير المكان تكدر البيض المهجور توزعه على باقي الأزواج ومتخسر البيض.
هاي الأمور لازم تخليها بالحسبان لان هواي نشوف منشورات بكروبات #الببغاوات عن هجر الأمهات للبيض أو البيض غير ملقح والمشتري ماعنده الخبرة الكافية وهنا رح يخسر فلوس بالخالي.
ملاحظة:
أي زوج ببغاوات مستقل أو طيور زينة من تنقله من مكان أي مكان ثاني تلقائيا رح تشوفه يدخل في مرحله #تبديل_ريش نتيجة تغيير البيئة المحيطة بي أولا وثانيا نتيجة التوتر لذلك يحتاج عالأقل شهر حته يتأقلم ويه الوضع الجديد وممكن يبدي ينتج بعد شهر ونص كذلك هاي الحالة ممكن تصير لو نقلت الطيور من قفص لقفص ثاني, وسلامتكم...
إن شاء الله تكونون انتوا وطيوركم بصحة وعافية.
